上環禧利街夏銘記

馬交鯨

最近在這裏睇到很多介紹，包括水餃麵、雲吞麵、魚蛋、牛腩……相當吸引。我留意到介紹的店鋪有：白加士街的麥文記和夏銘記、元朗鄭洪記、元朗好到底、黃大仙豪園、太子十大碗等等，簡直是雲吞牛腩麵專門資料「博庫」！剛巧跟博主溝通，佢話歡迎我寫新文，多多益善，又容許我用筆名，所以便取了「馬交鯨」投這篇稿。

先講水餃，以往我覺得黃大仙嗰間豪園嘅水餃有馬交水準，餃子裏面有木耳、筍絲同埋大地魚粉，可惜最近過香港時，發覺間鋪已經轉咗手改咗名。近年我發現澳門有一間在俾利喇街鳳凰臺美食啲水餃都唔錯，真材實料，但可惜就欠大地魚香味。

最近一次過香港，因為接近晚上八時，不想食太飽，只想吃雲吞麵水餃麵之類，而剛好在上環，於是便往禧利街夏銘記一試。

這店是新開的，相信老鋪在西環，數年前在佐敦白加士街美食區插旗，正是藝高店膽大，有真功夫的果然站得住腳，便陸續開了分店。

當晚點了一碗水餃麵，$48三隻水餃，麵夠分量，附兩條靚菜心。上環來說，價錢算是合理的了。麵我冇研究，沒有吃到有鴨蛋味的麵很久了，反正成功去梘水味我已經好滿足。這兒的水餃果然好功夫，足料，蝦新鮮，而且好香大地魚味！早知不叫麵，單叫淨水餃！

還好當晚神推鬼㧬，叫了一份單點的炸魚片，有五大塊，每塊都獨立包炸，像一個四方塊魚片頭，外香不在講，裏面也有鮮魚香！肉不是只有爽實的工業製作，而是極有口感、肉眼都見得到氣泡的自家製造。雖然五塊算分量多，但價錢不便宜，但係絕對不會後悔！

那晚吃得飽飽的，滿有幸福感，竟然還可以在香港吃到這麼美味的廣東名物，真是要把握機會，暫時放下金錢的牽掛，政見的左右，有得食時就要食了！